前嗰排，2015中国广州国际演艺交易会落下帷幕，至今已经系第五届了。上千台节目达成签约意向——睇来，出年广州人又有好演出睇了。

不过，熟悉广州市场嘅人都知道，呢座城市演出虽然好多，但要爆，要揾到真银，一啲都唔容易。因为，广州观众出名冷静，一个明星来到，要街坊兴致高到去买票，去挥舞荧光棒高声大叫，难度相比其他城市要大。

9月份，顾嘉辉荣休，来广州开巡回演唱会。当时演出嘉宾有汪明荃、郑少秋等，都系街坊好熟悉好中意嘅，但现场就系唔爆，连舞台经验丰富嘅汪阿姐都忍唔住话：“点解你哋咁静嘅？”最后，终归都要讲一段上世纪八九十年代第一次来广州开演唱会嘅往事，大家先开始欢呼。

无办法。广州人，见过太多明星了——叶丽仪1980年就来过广州，当时一张票先卖两毫纸；后尾系罗文，纪念堂连开7场，歌衫镶金嵌银；汪阿姐1987年来；然后先系谭咏麟、张国荣、四大天王……嗰阵时真系好爆，因为大家都未经历过。而家，演出市场开放三四十年，有乜嘢未见过啊？广州人又天生务实，性格唔容易激动。

但换言之，一个明星，如果可以喺广州做到场场爆满，咁佢嘅实力亦不言而喻。难怪行内话：广州市场系演出“试金石”，睇来此言非虚。